يوم ورا يوم

لأ مش أغنية سميرة سعيد
لأ بردو مش برنامج الدكتور محمد رفعت بتاع الأطفال ههههههه
تؤتؤتؤتؤتؤ


يوم ورا يوم من أيامي أنا
من حياتي وذكرياتي

يوم ورا يوم عشت سنيني اللي فاتت
يوم حبيت ويوم نسيت
يوم بكيت ويوم ضحكتي ملت الدنيا
يوم اتجرحت ويوم جرحت
يوم اتحبيت وشفت الحب قدامي وسبته وجريت
ويوم اتنسيت وفضلت أجري ورا اللي نسيني

أيام كتير عشتها
بحلوها وبمرها

بس مش عارفه ليه حاسه إن الأيام اللي جايه هتكون غير كل اللي فات
مش عارفه ليه حاسه إن حبي هيرجع وهترجع معاه روحي وحياتي وضحكتي وكرامتي وكل حاجه راحت مني
حاسه إني مستنيه حاجه مش عارفه إيه هي

وبرجع أخاااااااااف
ليكون حلم زي أحلام كتير حلمتها وصحيت منها لقيتها سراب
بخاف أرجع اتجرح من تاني وقلبي يوجعني من تاني
بخاف مترجعش ولا ترجع أيامي معاك
وأكون بكدب على نفسي كدبه كبيره أوي
بس مش عارفه ليه مصدقه إحساسي أوي

يمكن أكون غبية أوي
ويمكن يكون إحساس حقيقي وهيتحقق

مش بقول غير يارب
يارب لو من جوايا يبقى من أول ما عرفته وأنا حاسه إن هو ده ومحدش غيره
يارب لو من عندك يبقى اكتبلي الخير ومتخلنيش اتجرح ولا اتوجع لو يوم واحد تاني
يارب لو عليا نفسي أوي يرجع ومعرفش ليه مستياه
يارب لو مش هيرجع نسيني بجد وشيل من جوايا كل حاجه وأي حاجه ليه
يارب أنا قلبي دق ليه وأنا بقوله ربنا يخليك
يارب خليه
يارب

كلها أحلام وأمنيات
ويا يتحقق الحلم يا يبقى سراب زي غيره وغيره
أنا مش عايزه أي حاجه يارب غير اللي مكتوبلي
وراضيه بكل حاجه
وأكيد اللي باقي من حياتي هيعدي يوم ورا يوم
زي اللي فات ما عدا يوم ورا يوم